Туурвил инженерчлэлийн товч түүх

Никлаус Вирт
2008.2.25

Хураангуй

Хөтөлбөрлөх Урлагийн талаархи хувийн төсөөллөө бид толилуулж байна. Бид 1960-аад оны түвшнээс нь эхлээд өнөөг хүртэлхи хөгжлийн замналаар нь мөшгих болно. Холимог тогтолцоо зохиомжлоход тулгарах саад бэрхшээлүүдийг эвсгээр хэлэлцсэн 1968 оны бага хурлаас хойш Туурвил Инженерчлэл гэх нэр томъёо дуулдах болжээ. Шийдлийн эрэл хайгууль эхэллээ. Энэ нь илүү сайн аргачлал, илүү сайн багаж хэрэгслэлүүд дээр төвлөрч байв. Хамгийн их анхаарал татсан нь ажилбарын, цогцолборын тэгээд тусагдахууны чиглэлийн хэв маягийг тусгасан хөтөлбөрлөлийн хэлүүд байв. Туурвил инженерчлэл нь тэдгээрийн үүсэл, хөгжилтэй нягт уялджээ. Түүнчлэн хөтөлбөрийн баримтжуулалт болон сорилыг цэгцлэн улмаар автоматжуулах хүчин чармайлтууд чухалд тооцогдож байлаа. Тиймээс задлан шинжлэх нотолгоо болон алдаагүйжлийн баталгаа нь сорилыг орлоно хэмээн тооцож байв.           

Хожим тооцоолох хүчин чадал эрчимтэй өссөн нь тооцооллыг улам түвэгтэй даалгаврууд гүйцэтгэхэд хэрэглэх боломжтой болголоо. Уг хандлага нь туурвил инженерчлэлийн хэрэгцээ шаардлагыг огцом нэмэгдүүлжээ. Хөтөлбөр болон тогтолцоонууд улам түвэгтэй болж гүйцэд ойлгох бараг боломжгүй боллоо. Тооцооллын нөөцүүд арвижин өртөг зардал хямдарснаар сайн зохиомжид тавих анхаарал халамж яалт ч үгүй сулрав. Ашиг хөөцөөлдсөн уралдааны золиос болж чанар хадуурав гэлтэй. Гэсэн ч үүнээс улбаатай чанарын доголдлыг бид тооцох учиртай. Бидний арчаагүйтэл удаан тоноглолоос бус харин бидний оюуны чадвараас эхтэй. Ихэнхи хөтөлбөрийг эрс сайжруулан, ашиглахад илүү найдвартай, хэмнэлттэй, тухлаг болгож болно гэдгийг бид бүхэн туршлагаасаа мэднэ.